“Big Data” Tədqiqat Mərkəzi fəaliyyətə başlayır

15 dekabr 2017

  • Azərbaycanda yaradılmış ilk müasir “big data” mərkəzi
  • Ölkədə yeni bir sənaye sahəsinin inkişafına kömək
  •  “Big data”nın təhlili üzrə mütəxəssislərin, alimlərin və mühəndislərin yetişdirilməsinə dəstək   

BP və onun Azəri-Çıraq-Günəşli (AÇG), Bakı-Tbilisi-Ceyhan (BTC), Şahdəniz (ŞD) və Cənubi Qafqaz Boru Kəməri (CQBK) layihələrindəki tərəfdaşları – SOCAR, TPAO, PETRONAS, Chevron, LUKOİL, NİCO, Statoil, Inpex, ExxonMobil, SGC, Itochu, ONGC, TOTAL, ENI –Azərbaycanda ilk “Big Data” Tədqiqat Mərkəzinin fəaliyyətə başlamasını məmnuniyyətlə elan edir. Ötən ildən həyata keçirilməyə başlamış bu layihə BP-nin və tərəfdaşlarının ölkədə təhsilin inkişafına və iş bilgisinin artırılmasına dəstəyinin bir hissəsidir. 

Mərkəz ADA Universitetində yaradılıb. Bunun ardınca həmin universitetdə “Big Data”nın Təhlili və Data Elmi üzrə yeni magistr dərəcəsi proqramı da fəaliyyətə başlayacaq ki, bu da ölkənin data mütəxəssislərinə və “big data” üzrə analitiklərə olan ehtiyaclarının qarşılanmasına xidmət edəcək. Mərkəz həmçinin daha geniş təsirə malik olacaq – o, dövlət təşkilatları və özəl sektorun təmsilçiləri üçün açıq olacaq və onlara öz resurslarından istifadə imkanı yaradacaq.

Mərkəzin açılışına həsr edilmiş tədbirdə çıxış edən ADA Universitetinin rektoru, professor Hafiz Paşayev: “Mərkəzin yaradılması ölkənin akademik cəmiyyəti üçün çox vacibdir. O bütün sahələr üzrə tədqiqat bacarıqlarının genişləndirilməsinə və tədqiqat ekosisteminin inkişaf etdirilməsinə kömək edəcək. İnformasiya Texnologiyaları və Mühəndislik İnstitutu iş sahəsi və lazımi hesablama avadanlıqları ilə təchiz olunmuş laboratoriya yaratmaqla mərkəzin fəaliyyətə başlamasında əsas rol oynamışdır. Mən əminəm ki, mərkəz akademik cəmiyyət və sektorlar arasında olan qarşılıqlı faydalı əməkdaşlığı daha da möhkəmləndirəcək.”

BP-nin Azərbaycan, Gürcüstan və Türkiyə üzrə regional prezidenti Qəri Counz: “BP və tərəfdaşları bu yeni “big data” mərkəzini açmaqdan məmnunluq duyur. Bu mərkəz bu qəbildən olan ilk və, mən deyərdim ki, unikal bir tədqiqat ocağıdır və ölkədə yeni bir sənaye sahəsinin inkişafına təkan verəcək. İnanırıq ki, bu, ölkənin qlobal “big data” bazarının bir hissəsinə çevrilməsi və böyük həcmli məlumatların emalında regionda aparıcı yer tutması üçün geniş imkanlar  yaradır.

Ən əsası isə bu mərkəz ölkədə data üzrə ixtisaslaşmış alimlərin, data və informasiya üzrə mühəndislərin və “big data”nın təhlili üzrə peşəkar mütəxəssislərin yetişdirilməsinə təkan verəcək. Biz Təhsil Nazirliyi və ADA Universiteti ilə qurduğumuz əməkdaşlıqdan çox məmnunuq. Biz birlikdə, data elmləri üzrə təcrübə də daxil olmaqla, bir sıra sahələrdə ölkədə iş bilgisinin, bacarıqların və səriştələrin inkişaf etdirilməsinə dəstək olmaq üçün çox işlər görə
bilərik.”
Layihənin başlamasından ötən bir il ərzində data təhlili üzrə kitabxana yaradılıb, aparat və proqram təminatı daxil olmaqla bütün avadanlıqlar və resurslar və eləcə də 30 iş terminalı quraşdırılıb, işçi heyətinə təlim keçilib və hazırda Mərkəz fəaliyyət göstərməyə tam hazırdır.

Bu bir illik layihə 2016-cı ilin oktyabr ayında başlayıb və ADA Universiteti tərəfindən həyata keçirilir. Layihənin dəyəri $410000 təşkil edir.


Əlavə məlumat üçün BP-nin Bakı ofisindəki mətbuat xidmətində Tamam Bayatlıya müraciət edə bilərsiniz. Telefon: (+994 12) 599 45 57