İcmalarda erkən müdaxilə xidmətlərinin yaradılması

16 dekabr 2016

Cənubi Qafqaz Boru Kəməri Şirkəti məmnuniyyətlə elan edir ki, o, boru kəməri marşrutu boyunca yerləşən on bölgədə – Hacıqabul, Kürdəmir, Ağdaş, Ucar, Yevlax, Samux, Goranboy, Şəmkir, Tovuz, Ağstafa rayonlarında erkən müdaxilə xidmətlərinin yaradılması üzrə yeni icma layihəsinə başlayır. Bu, Cənubi Qafqaz Boru Kəmərinin Genişləndirilməsi (CQBKG) layihəsinin sosial sərmayə proqramı çərçivəsində həyata keçirilən bir təşəbbüsdür. Layihənin məqsədi uşaqların inkişafı prosesində erkən müdaxilənin əhəmiyyəti barədə həm icmanın, həm də səhiyyə sektorunun məlumatlılığını artırmaqdır.

Layihə uşaqlarda əlillik və inkişafdan geri qalma hallarını mümkün qədər erkən dövrlərdə aşkar etmək və bu halların aradan qaldırılması üçün müdaxilə etmək istiqamətində xidmətlərin göstərilməsini nəzərdə tutur. Bu layihə çərçivəsində görüləcək işlər boru kəməri boyunca yerləşən on rayonda erkən müdaxilə mərkəzlərinin yaradılması, hər bir rayon mərkəzi üçün üç nəfər erkən müdaxilə mütəxəssisinə təlimlərin keçirilməsi, valideynlərin öz uşaqlarının inkişafında fəal iştirak etməsinə şərait yaradılması və ictimaiyyəti erkən müdaxilənin əhəmiyyəti barədə maraarifləndirilməsini əhatə edir.

BP-nin əlaqələr, xarici işlər və strategiya üzrə vitse-prezidenti Bəxtiyar Aslanbəyli dedi: “Biz hesab edirik ki, bu layihənin əhatə etdiyi mövzu bir sıra tərəflərin, o cümlədən Səhiyyə Nazirliyinin, yerli icra hakimiyyəti orqanlarının, yerli səhiyyə qurumlarının və məktəblərin, valideynlərin və bütün ictimaiyyətin diqqət mərkəzində olan bir məsələdir. Ona görə də, gözləntimiz ondan ibarətdir ki, bu layihə həmin maraqlı tərəflərin hamısını bir ümumi məqsəd ətrafında toplayacaq, yəni mümkün qədər erkən dövrlərdə uşaqların inkişafına müdaxilə etməklə fiziki və əqli cəhətdən sağlam vətəndaşların yetişdirilməsi məqsədinə xidmət edəcək.

Erkən müdaxilə beynəlxalq təcrübədə qəbul edilmiş xidmətlər sistemidir. Ümid edirik ki, layihə bu təcrübəni təbliğ etməklə erkən müdaxilənin uşaqların əlilliyini düzəltməkdə və onların həyatını dəyişməkdə nə qədər effektiv olduğu barədə icmaları maarifləndirməyə yardım edəcək.”

Layihənin müddəti bir ildir və dəyəri isə təxminən 331000 AZN təşkil edir.

Layihə əlil və inkişafdan geri qalmış uşaqlar üçün xidmətlər göstərmək məqsədilə uşaqların inkişafı üzrə mütəxəssislərə təlim verməkdə 18 illik təcrübəsi olan yerli qeyri-hökumət təşkilatı UAFA (The United Aid for Azerbaijan) tərəfindən yerinə yetiriləcək.


Əlavə məlumat üçün BP-nin Bakı ofisindəki mətbuat xidmətində Tamam Bayatlıya müraciət edə bilərsiniz. Telefon:  +994 12 599 45 57.